ATİ-nin rektoru, tarix elmləri doktoru, professor Cəfər Cəfərov, institutun dekanı, fizika-riyaziyyat elmləri namizədi, dosent Nəsrulla Nəsirli Türkiyənin Ərzurum şəhərində keçiriləcək Avrasiya İpək Yolu Universitetləri Konsorsiomunun İcraçı Şurasının iclasında və I Qış Anadolu Sammitində iştirak edəcəklər

Türkiyənin İğdır Universitetinin nümayəndələri Şahin Əhmədoğlu və Elşad Abdullayev Azərbaycan Turizm İnstitutunda (ATİ) olmuşlar. Görüşdə institutun prorektoru Eldar Aslanov institutun yaranma tarixi, fəaliyyəti və beynəlxalq əlaqələri barədə məlumat vermişdir.
Bildirmişdir ki, bu ali təhsil ocağı Avstriyanın Krems Tətbiqi Elmlər Universiteti ilə təhsil sahəsində beynəlxalq əməkdaşlıq müqaviləsi imzalamışdır.
Avropa İttifaqının Erasmus Mundus proqramı çərçivəsində tələbə-müəllim mübadiləsinin əhəmiyyətini qeyd edən E.Aslanov Şimali Kiprin Girne Amerika və Doğu Akdeniz universitetləri, Almaniyanın Oldenburq Tətbiqi Elmlər və Jade universitetləri ilə əməkdaşlığın faydalılığından danışmışdır.
Səmimi görüşə görə təşəkkürünü bildirən Şahin Əhmədoğlu İğdır Universitetinin 2008-ci ildən fəaliyyət göstərdiyini, 6 fakültə və ali təhsil ocağının nəzdindəki institutlarda 2800 tələbənin təhsil aldığını diqqətə çatdırmışdır. O, Ağrıdağ Araşdırma Mərkəzində aparılan tədqiqatların əhəmiyyətindən danışmış, İğdir Universitetində 2012/2013-cu tədris ilindən etibarən turizm fakültəsinin fəaliyyət göstərəcəyini bildirmişdir. Qonaq ATİ-nin bu sahədəki təcrübəsindən yararlanmağın faydalılığına inandığını vurğulamışdır.

Bakı, 6 fevral (AzərTAc). Yanvarın 28-dən fevralın 5-dək Şimali Kiprin Doğu Akdeniz Universitetində (DAU) “XXI əsrdə turizmin və mədəniyyətin menecmentinin tədrisində kurikulumun rolu” mövzusunda beynəlxalq təcrübə mübadiləsi kursu təşkil olunmuşdur. Azərbaycan Turizm İnstitutunun (ATİ) bir qrup əməkdaşı beynəlxalq kursda iştirak etmişdir. ATİ-nin turizm işinin təşkili və idarəedilməsi fakültəsinin dekanı Nəsrulla Nəsirli AzərTAc-a bildirmişdir ki, beynəlxalq mübadilə kursunda institutun əməkdaşları əsasən TedQual sertifikatının alınması üçün lazımi sənədləşmə və prosedurlarla tanış olmuş, sillabus və kurikulumların tərtibatı üzrə təcrübə mübadiləsi aparmış, gələcək əməkdaşlığın parametrlərini yenidən nəzərdən keçirmişlər.
Səfər çərçivəsində təhsil müəssisələri arasında tələbə mübadiləsi, yay məktəbinin və dil kurslarının təşkili, magistrlər üçün ikili diplom proqramlarının hazırlanması istiqamətində geniş fikir mübadiləsi aparılmış, təkliflər verilmişdir.
ATİ ilə DAU arasında əməkdaşlıq müqaviləsi 2010–cu ildə imzalanmışdır.